តារា​ឆ្នើម Lionel Messi របស់​ក្លិប Barcelona បានឈ្នះ​ពានរង្វាន់​បាល់​មាស FIFA Ballon d’Or ជា​លើក​ទី​៥​សម្រាប់​កីឡាករ​ឆ្នើម​បំផុត​ក្នុង​ពិភពលោក​ក្នុង​កម្មវិធី​មួយ​នៅ​ទីក្រុង Zurich កាលពី​រាត្រី​ថ្ងៃ​ចន្ទ​។​

​ខ្សែប្រយុទ្ធ​អន្តរជាតិ​អា​ហ្ស​ង់​ទីន​រូបនេះ​បាន​ទម្លាក់​ម្ចាស់​ពាន​បាល់​មាស​បី​សម័យកាល Cristiano Ronaldo ដើម្បី​បន្ថែម​ទៅលើ​ពាន​ចំនួន​៤​ដែល​រូប​កេ​បានឈ្នះ​ចាប់ពី​ឆ្នាំ​២០០៩ ដល់​ឆ្នាំ​២០១២​។ ខ្សែប្រយុទ្ធ​អន្តរជាតិ Neymar ដែល​ក៏​លេង​ឲ្យ​ក្រុម Barcelona ផងដែរ​នោះ បាន​ស្ថិតក្នុង​ចំណាត់ថ្នាក់​លេខ​៣​ក្នុងការ​បោះឆ្នោត​មួយ​ពី​សំណាក់​គ្រូបង្វឹក​នៃ​ក្រុម​ជម្រើសជាតិ ប្រធាន​ក្រុម​ជម្រើសជាតិ និង​អ្នកកាសែត​។

Messi វ័យ​២៨​ឆ្នាំ បាន​ឲ្យ​ដឹងថា​៖ «​វា​ពិតជា​ពេលវេលា​ដ៏​ពិសេស​មួយ​ក្នុង​ការវិល​ត្រឡប់មក​វិញ​ដើម្បី​ទទួលពាន Ballon d’Or ម្តងទៀត ក្រោយពី​ខកខាន​ក្នុងការ​ឈ្នះ​ពីរ​ឆ្នាំ ដែល​នៅពេលនោះ Cristiano Ronaldo បានឈ្នះ​ទាំងពីរ​លើក​។ វា​ជា​រឿង​ដ៏​អស្ចារ្យ​ដែល​វា​ជាការ​ឈ្នះ​ជា​លើក​ទី​៥​របស់ខ្ញុំ​។

​ពាន Ballon d’Or មានន័យ​ជាង​ខ្ញុំ​អាច​សុបិន​ក្នុងពេល​ស្ថិត​ជា​កុមារ​ម្នាក់​ទៅទៀត​»​។ Messi ដែល​បាន​បោះឆ្នោត​សម្រាប់​មិត្ត​រួម​ក្រុម Barcelona របស់ខ្លួន​គឺ Luis Suarez នោះ បានទទួល​សំឡេងឆ្នោត​៤១​ភាគរយ ខណៈដែល Ronaldo ទទួលបាន​២៨​ភាគរយ ហើយ Neymar ទទួលបាន​៨​ភាគរយ​។ លោក Luis Enrique គ្រូបង្វឹក​នៃ​ក្រុម Barcelona របស់គេ បានឈ្នះ​ពាន​គ្រូបង្វឹក​ឆ្នើម​ប្រចាំឆ្នាំ ខណៈដែល Jill Ellis បានឈ្នះ​ពាន​កីឡាការិនី​ឆ្នើម​ប្រចាំឆ្នាំ​។

​កីឡាការិនី​រូបនេះ បាន​ជួយ​ឲ្យ​ក្រុមបាល់ទាត់​ជម្រើសជាតិ​នារី​របស់​អាមេរិក​ឈ្នះ​ពាន World Cup នៅ​កាណាដា កាលពី​រដូវក្តៅ​មុន​តាមរយៈ​ការ​ផ្តួល​ក្រុម​ជម្រើសជាតិ​ជប៉ុន​ក្នុង​លទ្ធផល ៥-២ ក្នុង​វគ្គ​ផ្តាច់ព្រ័ត្រ​៕

​ប្រភព​៖ Channel News Asia , cambosport

​